JetBlue ta amplia presencia na New York cu beneficio potencial pa Aruba

NEW YORK – JetBlue Airways a gana un subasta di bancarota pa cumpra e slotnan di buelo di Spirit Airlines na aeropuerto LaGuardia (LGA) pa un suma di 58.5 miyon dolar. E compañia a anuncia tambe cu lo trasladá tur su operacionnan na e historico Marine Air Terminal (Terminal A).

JetBlue a supera Frontier Airlines den e subasta pa solamente un miyon dolar. E compra ta inclui 22 slot di buelo (12 salida y 10 yegada diario), loke lo permiti e aerolinea añadi te na 12 buelo ida y bini diario den su red.

E transaccion ainda mester ricibi aprobacion final di Corte di Bancarota di Estados Unidos na New York y di e Federal Aviation Administration (FAA). Si tur bay segun plan, JetBlue lo integra e slotnan nobo den su horario di buelo durante 2027.

Como parti di e expansion, JetBlue lo muda for di Terminal B pa e historico Marine Air Terminal (Terminal A), un edificio iconico di estilo Art Deco. Spirit Airlines tabata e principal usuario di e terminal te ora e compañia a declara bancarota y a para tur operacionnan.

EFECTO PA ARUBA

Pa Aruba, e expansion por crea mas flexibilidad den e red di JetBlue. Aunke no tin anuncio di rutanan nobo pa momento, mas capacidad na LaGuardia por facilita mihor conexionnan pa pasaheronan cu ta biaha entre New York y Aruba of cu ta conecta cu otro destinacionnan den Estados Unidos.

Autoridad Portuario di New York y New Jersey a expresa cu e mudanza lo yuda reduci congestion na e otro terminalnan principal mientras cu e historico Marine Air Terminal ta keda den uso activo.