Prome tayer di salud mental pa atletanan ta atrae gran interes

ORANJESTAD – E prome di dos tayernan di salud mental organisa pa Aruba Athletes’ Commission (AAC) a resulta un gran exito  na Universidad di Aruba. E actividad a registra un participacion sobresaliente, cu un sala yen di atletanan di diferente edad y disciplina deportivo.

E gran asistencia a mustra cu e tema di salud mental ta bira cada biaha mas importante den e mundo di deporte y cu atletanan local ta interesa den fortalece no solamente nan condicion fisico, sino tambe nan bienestar mental.

E sesion a conta cu e participacion di Dr. Shakiba Moghadam di Reino Uni, un psicologo deportivo cu amplia experiencia cu atletanan profesional y Olimpico. Ademas di su trayectoria profesional, Moghadam tambe a practica boxeo na nivel competitivo, loke a agrega un perspectiva unico na e presentacion.

Durante e tayer interactivo di dos ora, tabatin amplio intercambio entre e especialista y e atletanan, creando un ambiente dinamico y educativo enfoca riba e reto mental cu deportistanan ta confronta.

Comite Olimpico Arubano (COA) a expresa su satisfaccion cu e gran acogida cu e iniciativa a ricibi. Segun COA, e exito di e prome sesion ta confirma e necesidad di continua ofreciendo programanan enfoca riba salud mental pa atletanan local.

COA y Aruba Athletes’ Commission a indica cu nan lo sigui trahando hunto pa organiza mas actividadnan di e tipo aki, cu e meta di alcanza un cantidad aun mas grandi di atletanan den Aruba.