Bon noticia pa Corsou: Jürgen Locadia por hunga contra Alemania den Mundial

WILLEMSTAD – Seleccion nacional di Corsou a ricibi un impulso importante rumbo na su debut historico den Copa Mundial FIFA 2026. FIFA a confirma cu delantero Jürgen Locadia lo por participa den e prome partido di grupo contra Alemania.

Locadia a haya un carchi cora durante e partido amistoso contra Escocia, despues cu e la toca un adversario cu su codo. Tabatin temor cu FIFA lo imponi un suspension mas largo, pero finalmente e organismo mundial a decide cu e castigo lo ta solamente un partido.

E suspension a wordo cumpli durante e partido preparatorio contra Aruba, permitiendo cu Locadia ta disponible pa e encuentro historico contra Alemania dia 14 di juni.

E noticia ta un alivio pa entrenador Dick Advocaat, cu ta considera Locadia un di e piezanan importante den su ekipo. Durante e ultimo simannan tabatin incertidumbre si e atacante lo por a participa den e debut mundialista di Corsou.

Cu excepcion di e wega contra Aruba cu nan a gana 4-0, Corsou no a logra resultado positivo den su preparacion pa Mundial. E seleccion a perde 2-0 contra China, 5-1 contra Australia y 4-1 contra Escocia. Contra Escocia, Corsou tabata ganando 1-0 gracias na un gol di Tahith Chong, pero e carchi cora di Locadia a cambia completamente e partido y eventualmente conduci na e derrota.

Corsou ta sigui prepara pa haci historia. E pais lo enfrenta Alemania den su prome partido di Mundial, sigui pa encuentronan contra Ecuador y Costa di Marfil.

Corsou ta haci historia como e pais mas chikito cu nunca a clasifica pa un Copa Mundial. Ademas, Dick Advocaat, cu tin 78 aña di edad, lo bira e entrenador nacional mas bieu cu a participa den un Mundial FIFA.