Rainbow Warriors ta pidi accion climatico y mas proteccion ambiental na Aruba

ORANJESTAD – Na ocasion di Dia Mundial di Medio Ambiente 2026, Rainbow Warriors Core Foundation a haci un yamado pa mas accion climatico y un enfoque integral pa proteha medio ambiente na Aruba.

Segun e fundacion, e tema mundial di e aña aki, “Un Yamada Global pa Accion Climatico”, ta enfatisa cu cambio climatico ya no ta un problema di futuro, sino un realidad cu ta afecta mundo henter a traves di temperatura record, secura, inundacion, tormentanan extremo y subida di nivel di laman.

E organizacion a destaca cu Aruba recientemente a haya reconocimiento como UNESCO Biosphere Reserve, loke segun nan ta aumenta e responsabilidad pa implementa maneho sostenible y proteha naturaleza.

Sinembargo, e fundacion ta critica cu Aruba ainda no tin suficiente legislacion ambiental y cu hopi tratado internacional importante riba proteccion ambiental y cambio climatico ainda no a ser implementa of ratifica. Entre e preocupacionnan menciona ta falta di ley pa maneho ambiental, estudio di impacto ambiental, proteccion di laman y regulacion di contaminacion.

Rainbow Warriors Core Foundation tambe a expresa preocupacion cu e intento pa establece un Dialogo Nacional basa riba e Obhetivonan di Desaroyo Sostenibel (SDGs) di Nacionan Uni no ta avanzando manera spera. Segun e fundacion, falta di consenso entre diferente sector ta poniendo obstaculo den e proceso.

E organizacion ta conclui cu Aruba mester reanuda e Dialogo Nacional, fortalece su marco legal ambiental y implementa e compromisonan internacional relaciona cu cambio climatico y sostenibilidad. Segun nan, solamente cu participacion di tur sector di sociedad por logra un futuro mas sostenible pa Aruba.