Corsou ta rumbo pa Merca pa su prome experiencia den Copa Mundial di Futbol

WILLEMSTAD – Seleccion nacional di futbol di Corsou ta cuminsa su bahe rumbo pa Merca, unda lo participa den Copa Mundial FIFA 2026. E salida marca e inicio oficial di e ultimo fase di preparacion pa e torneo historico, cu lo representa e prome participacion mundialista den historia di Corsou.

Segun Federashon di Futbol Corsou (FFK), e delegacion ta sali dialuna via Jet Center Corsou. Pa garantisa un proceso eficiente y permiti cu e hungadornan mantene nan enfoke total riba e reto deportivo cu ta sperando nan, e ekipo no a usa e terminal comercial regular di aeropuerto.

FFK a expresa su gratitud na pueblo di Corsou pa e gran apoyo y entusiasmo demonstra durante e preparacion pa Mundial. Segun e federacion, e sosten continuo di comunidad ta sirbi como motivacion adicional pa e seleccion durante e aventura historico aki.

Corsou lo haci su debut den Copa Mundial dia 14 di juni contra Alemania. Despues di esey, e seleccion lo enfrenta Ecuador y Costa di Marfil den e fase di grupo.

E participacion di Corsou den Mundial 2026 ta marca un momento unico den historia deportivo di e isla. Ademas di clasifica pa su prome Mundial, Corsou ta bira e pais mas chikito cu nunca a logra participa den un fase final di Copa Mundial FIFA.