Minister Gerlien Croes riba conseho di RvS: ‘Ora nos caba di bespreek, mi lo duna reaccion’

ORANJESTAD – Mientras cu e debate riba Ley Reino HOFA ta sigui intensifica despues di publicacion di e conseho di Conseho di Estado di Reino (Raad van State) dialuna mainta, Ministro di Asuntonan di Reino, Gerlien Croes, a indica na Noticiacla cu Gobierno ainda no ta cla pa presenta un posicion oficial. “Ora nos caba di bespreek, mi lo duna reaccion,” Croes a responde na pregunta di Noticiacla tocante e evaluacion di Raad van State.

REACCION POLITICO 

E reaccion cauteloso di e ministra ta bin durante un momento importante den e discusion politico. E conseho di Raad van State no a rechasa e propuesta di ley HOFA, pero si a identifica varios punto cu mester wordo clarifica y ahusta. E conseho a confirma cu un Ley Reino di consenso basa riba Articulo 38 di Statuut ta un instrumento legitimo, pero tambe a advirti cu cualkier limitacion di autonomia di Aruba mester keda estrictamente limita na loke ta necesario.

PUNTO PRINCIPAL

Un di e punto principal den e conseho ta e preocupacion cu Aruba no por modifica ciertonan disposicion den su propio ley local sin aprobacion previo di Conseho di Ministernan di Reino. Segun Raad van State, e mecanismo aki mester wordo limita solamente na e normanan concreto di debe nacional y disciplina presupuestario, pa evita un interferencia mas amplio den autonomia legislativo di Aruba.

REACCION DI MEP

Durante e fin di siman, diferente reaccionnan politico a cuminza sali. Lider di MEP, Evelyn Wever-Croes, a interpreta e conseho como un confirmacion cu HOFA efectivamente implica un limitacion structural di autonomia. Na otro banda, e posicion oficial di Gobierno ainda no a wordo presenta.

REACCION DI HULANDA

Tambe Secretario di Estado Hulandes pa Relacionnan di Reino, Eric van der Burg, a indica cu ni Hulanda ni Aruba lo reacciona oficialmente ainda, paso ta wordo prepara un reaccion conjunto cu posteriormente lo wordo manda na Tweede Kamer y na Parlamentonan di Aruba, Corsou y Sint Maarten. Van der Burg si a expresa satisfaccion cu Raad van State a entrega su conseho rapidamente.

ANALISA CONTENIDO

Pa awor, Gobierno di Aruba ta analiza e contenido completo di e documento. E declaracion di Gerlien Croes ta indica cu e gabinete kier evalua e recomendacionnan di Raad van State cuidadosamente prome cu formula su reaccion oficial.  Mientrastanto, e debate riba HOFA ta sigui centra riba e pregunta fundamental cu Raad van State mes a identifica: con pa logra disciplina financiero sostenibel sin cu autonomia constitucional di Aruba wordo limita mas cu estrictamente necesario.