TTW: Aruba ta lider den ocupacion di hotel den Caribe e luna di juli

ORANJESTAD – Aruba lo ta entre e destinacionnan cu   ocupacion di hotel den Caribe mas halto durante juli 2026. Segun un analisis di Travel and Tour World (TTW), Aruba ta encabeza e region cu un ocupacion entre 85% y 88%, e porcentahe mas halto di tur e paisnan evalua.

E informe ta atribui e demanda fuerte na varios factor. Entre nan ta Aruba su posicion pafor di e zona di horcan, su reputacion como un destino sigur, e gran cantidad di bishitantenan cu ta bolbe, y un fuerte oferta di hotelnan di lujo y all-inclusive.

TTW ta indica cu mas cu 75% di e turistanan cu ta pasa anochi na Aruba ta bin for di Merca. Alabes, conexionnan directo cu diferente ciudadnan grandi na Merca a contribui pa mantene e demanda na un nivel haltu.

Ademas, e informe ta conclui cu Aruba a sobresali riba otro destinacionnan pasobra e isla a combina seguridad, conectividad aerea, y un fuerte reputacion den turismo di calidad. E investigacion ta señala cu Aruba a supera destinacionnan manera Republica Dominicana, Bahamas y Jamaica den porcentaje di ocupacion di hotel durante e periodo. NOTA: potret ta crea cu AI como ilustracion di e articulo.