Ex politico Croes a cuestiona maneho di AZV den caso di su yiu cu cancer

ORANJESTAD –  Ex-politico Ricardo Croes diabierna a cuestiona e maneho di AZV den e tratamiento di su yiu, kende ta enfrenta un lucha contra cancer. Segun Croes durante un conferencia di prensa   a papia di retrasonan den e proceso, y con falta di comunicacion y diferente decisionnan medico a afecta e tratamiento cu e famia tabata buscando pa e paciente.

DECISION TARDA

Croes a relata cu despues cu un ciruhano na Bogota a bay di acuerdo cu un tratamiento di imunoterapia, e famia a pidi repetidamente pa sigui cu e opcion aki. Segun e, e decision a wordo atrasa durante simannan y finalmente no a haya aprobacion, obligando nan considera paga parti di e gastonan cu nan propio recurso.

FALTA DI COORDINACION

Segun Croes, durante henter e proceso tabatin falta di coordinacion entre diferente instancia medico y administrativo. El a bisa cu e famia mester a warda hopi tempo pa haya contesta riba peticionnan y cu nan no a sinti cu e urgencia di e caso tabata refleha den e maneho di AZV. Croes tambe a critica e trato cu, segun e, nan a ricibi di un specialista na Aruba. El a describi e actitud como poco empatico y no profesional.

CRITERIO PA APROBA IMUNOTERAPIA

Ademas, el a cuestiona e criterio cu Aruba ta usa pa aproba imunoterapia, alegando cu na Colombia, e tratamento tabata considera un opcion pa reduci e tumor prome cu un operacion, mientras cu na Aruba e lo ta principalmente disponibel pa paciente den fase paliativo.

SISTEMA DEMASIADO LENTO

Croes a enfatisa cu su critica no ta dirigi contra tur medico, sino contra loke el considera un sistema cu ta move demasiado lento den caso serio manera cancer. El a anuncia tambe cu lo presenta un keho formal contra e specialista cu, segun e, a trata nan di un forma inaceptabel.