ATA kier move Aruba pa turismo regenerativo: e bishitante mester laga algo atras

ORANJESTAD – Aruba Tourism Authority ta preparando un siguiente cambio fundamental den su strategia turistico: di “High Value, Low Impact” pa un modelo di turismo regenerativo. E meta no ta solamente reduci e impacto di turismo, pero logra cu turismo activamente contribui na restaura, mehora y fortalece Aruba. Durante su presentacion pa prensa, CEO di ATA Ronella Croes a splica cu strategia turistico di Aruba a pasa door di diferente fase.

Na 2018 ATA a introduci e modelo High Value, Low Impact, enfoca riba atrae bishitantenan cu crea mas valor economico mientras limita impacto negativo.

Awor ATA ta mira un paso mas leu: turismo regenerativo.

Segun e filosofia aki, sostenibilidad solamente no ta suficiente. Turismo no mester simplemente evita haci daño; e mester contribui na restaura loke ta deteriora, remedia problema y fortalece naturaleza, cultura y comunidad. Croes a relaciona e modelo cu un balance entre proteccion di naturaleza, cuido di medio ambiente, preservacion di cultura Arubano y ofrece bishitante un experiencia di calidad. E idea ta cu un bishitante no solamente ta bin Aruba, disfruta y bai. Idealmente, e bishitante mester laga algun balor atras — sea via comportamiento responsabel, apoyo na cultura y comunidad, of participacion den iniciativa cu beneficia e destino. ATA ta considera esaki como un siguiente fase den evolucion di turismo.

E autoridad a indica tambe cu a entrega un documento di posicion cu mas cu 100 accion cu por contribui na bienestar di turismo y Aruba. Pero ATA ta enfatisa cu e responsabilidad no por cay solamente riba autoridad di turismo. Gobierno, sector priva, residentenan y bishitantenan tur tin un papel. E filosofia nobo ta encerra un cambio importante den pregunta central di turismo Arubano. Ya no ta solamente: con nos por atrae mas bishitante?

E pregunta ta bira: con turismo por laga Aruba den un condicion miho cu con el a haya e isla?