Croes: ATA a confirma e kehonan riba turistanan Argentino y ta ahusta strategia

ORANJESTAD – Aruba Tourism Authority (ATA) ta consciente di e kehonan cu comerciante y residentenan na Aruba ta expresa tocante comportamiento di cierto turista Argentino, hustamente den un periodo cu cantidad di bishitante for di Argentina ta sigui crece fuertemente. CEO di ATA, Ronella Croes, a confirma cu e organisacion ta tende e feedback aki y ya ta ahustando su strategia den e mercado Argentino.

CRECEMENTO VS CRITICA 

Durante un entrevista cu Noticiacla, Tito Laclé a confronta Croes cu e contraste entre crecemento fuerte di turismo for di Argentina y e criticanan cu ta wordo tendi na Aruba tocante comportamento y perfil di cierto bishitante for di e mercado ey. Laclé a puntra si ATA ta consciente di e kehonan di comerciante y ciudadano, y con e autoridad turistico ta maneha e situacion. Croes a confirma cu ATA a cuminsa observa e feedback. “E criticanan di comportamiento, nos a cuminsa mira nan,” Croes a declara.

CHECK CU AEROLIÑA

Segun e, ATA no a keda solamente cu e señalnan local, pero a hiba e asunto tambe na socionan den industria, incluyendo Aerolíneas Argentinas, pa wak con por cambia e manera cu Aruba ta wordo promociona den e mercado ey. “Nos a papia cu, den e caso aki, Aerolíneas Argentinas, entre otro, pa wak con pa cambia e strategia di comunicacion,” el a splica.

REDUCCION DEN PROMOCION PA ARGENTINA

Croes a confirma tambe cu ATA ya a reduci su presupuesto promocional na Argentina. “Mi por bisa cu nos a reduci presupuesto den e mercado di Argentina,” el a declara. Segun Croes, e cambio ta forma parti di un strategia mas amplio pa no sigui stimula un mercado automaticamente solamente pasobra e ta creciendo. Argentina a registra un crecemento fuerte y, segun e, ATA mester busca e balansa entre cantidad di bishitante y e tipo di bishitante cu Aruba kier atrae.

ASUNTO TA COMPLICA

E asunto ta mas complica pasobra turista Argentino no ta yega Aruba solamente cu buelo directo. Croes a menciona cu nan ta ocupa hopi asiento tambe via Copa, LATAM y Avianca, locual por limita espacio pa crecimiento di otro mercado manera Brasil y Chile. ATA ta considera pa baha estimulo na Argentina y, na mes momento, aumenta esfuerzo den otro mercado Suramericano.

Pero e declaracion mas notable di Croes tabata cu ATA y su socionan ta tumando e feedback di comunidad Arubano tocante e perfil di bishitante seriamente. “Nos mes ta tende nos residentenan den esaki y wak con nos por reemplasa cu un mihor perfil di visitante,” Croes a declara. Segun e, Aerolíneas Argentinas y otro socio tambe ta consciente di e situacion y ta wak con nan por contribui pa atrae un otro tipo di biajero.

E contesta di Croes ta confirma cu ATA no solamente ta consciente di e kehonan tocante cierto turista Argentino, pero e feedback local ya ta influenciando decisionnan di mercadeo y strategia turistico.