Long Table Aruba 2026 a recauda $100.000 pa cinco organisacionnan local

ORANJESTAD – E di ocho edicion di Long Table Aruba a culmina cu un otro exito impresionante, recaudando un total di $100.000 pa beneficio di cinco organisacionnan local. E evento caricativo, organiza pa Wind Creek Aruba hunto cu varios partnernan, a reuni 1.000 participante den un experiencia culinario unico y a reafirma su compromiso cu comunidad Arubano. Desde su inicio na 2017, Long Table Aruba a recauda casi medio miyon dollar pa diferente causa local. Segun Gerente General di Wind Creek Aruba, Paul Gielen, e iniciativa ta representa mucho mas cu un cena. “Long Table Aruba ta mustra loke nos por logra hunto como comunidad. Nos objetivo ta sostene organizacionnan cu ta haci un diferencia real den bida di hende na Aruba,” el a declara. E aña aki, Wind Creek Aruba a reintroduci e popular “video contest”, invitando organizacionnan pa presenta un video cortico describiendo nan mision, impacto y necesidadnan financiero. Un total di 21 organisacion a participa, mientras cu comunidad a determina e ganadornan mediante votacion online. Danki na benta di ticketnan, a logra recauda $60.000. Wind Creek Aruba posteriormente a agrega un donacion adicional di $40.000, elevando e total na $100.000. Como resultado, cada un di e cinco organizacionnan selecciona a ricibi un donacion di $20.000.

E beneficiario nan di Long Table Aruba 2026 ta:

Fundacion Pedal for Progress

Fundacion Respeta Mi

Fundacion Ultimo Deseo Aruba

Stichting CasMarie

Stichting ScubbleBubbles

Segun e organizadornan, e iniciativa ta reconoci e trabou balioso cu e organisacionnan aki ta realisa diariamente pa mehora calidad di bida den Aruba. E anochi tabata caracteriza pa solidaridad, generosidad y colaboracion. Ademas di un experiencia gastronomico di alto nivel, e evento a brinda un oportunidad pa lidernan comunitario, empresarionan y boluntarionan conecta y fortalece nan compromiso cu desaroyo social di Aruba.

Wind Creek Aruba a expresa gratitud na tur sponsor, boluntario, participante y partner cu a contribui na e exito di e evento, enfatizando cu Long Table Aruba a bira uno di e actividadnan filantropico mas importante di e isla.