AHATA ta promove medidanan pa proteha trahadonan contra calor intenso

ORANJESTAD — Cu calor fuerte cu ta sigui presenta na Aruba, AHATA su Comite di Medio Ambiente a prepara material educativo pa yuda companianan y trahadonan reduci riesgo relaciona cu exposicion na calor.

E material ta recomenda cu dunadornan di trabao tene cuenta cu e oranan di mas calor ora di programa tareanan, percura pa awa ta semper disponibel y crea posibilidad pa break cortico den sombra of den un lugar fresco. Tambe ta recomenda alterna tareanan pa evita exposicion prolonga na solo.

Trahadornan mes ta wordo anima pa reconoce señalnan di alerta manera mareo, gana di saca, falta di forsa, cansancio fuera di normal y cram di musculo. Si un persona presenta uno of mas di e sintomanan aki, e actividad mester stop, e persona mester wordo hiba pa un lugar fresco y no mester keda su so. Si e sintomanan ta serio of no ta mehora, mester busca ayudo mesora.