Trahadornan di Arubus ta exigi fecha y solucion concreto pa salario

ORANJESTAD — Trahadornan di Arubus N.V. a dirigi un carta habri na Gobierno di Aruba diabierna atardi y na minister Arthur Dowers, exigiendo claridad, fecha concreto y accion tocante nan salario, despues di mas di 10 aña cu e asunto ta pendiente.

Den e carta, e trahadornan ta reconoce cu Arubus ta enfrenta problema financiero y cu e subsidio cu Gobierno ta duna e compania no ta suficiente. Nan ta menciona tambe obligacionnan financiero di e compania, incluyendo debe cu DIMP. Sinembargo, nan ta enfatisa cu e situacion no a wordo causa pa e personal.

“Ningun di e problemanan financiero aki a wordo causa pa e trahadornan”,  e carta ta bisa. 

E grupo ta cuestiona pakico, si Gobierno mes ta reconoce cu e subsidio anual no ta suficiente, e suma ta sigui keda na un nivel cu no ta permiti e compania funciona debidamente y cumpli cu su obligacionnan pa cu personal.

Un di e preguntanan central den e carta ta:  “Despues di mas di 10 aña di spera, ki ora exactamente Gobierno y Arubus N.V. lo regla e asunto di salario di e trahadornan?”

E trahadornan ta pidi un plan concreto, incluyendo un fecha, y ta cuestiona tambe pakico tin plan pa renovacion di edificio, terminal di San Nicolas, equipo, truck y busnan nobo, mientras nan salario ainda no tin un solucion definitivo.

Tambe e estado di e flota ta preocupa e personal. Segun nan, hopi bus ta daña y tin falta di unidad pa cubri tur ruta. Nan ta pidi Gobierno y gerencia explica cua ta e plan inmediato pa pone suficiente bus bek riba caminda.

E trahadornan ta aclaria cu nan no ta contra inversion den renovacion, mantenimiento of busnan nobo. “Trahadornan no ta contra renovacion, busnan nobo, mantenimiento, edificio ni otro inversion. Nos sa cu tur esaki ta necesario. Pero e trahadornan tambe ta necesario”, e carta ta sigui bisa. 

Segun e carta, personal ta sigui presenta na trabou y mantene servicio publico andando, apesar di falta di bus y otro dificultadnan operacional. Nan ta cuestiona pakico cada problema financiero of operacional termina afectando e mesun grupo.

“Nos no ta responsabel pa un subsidio cu no ta suficiente. Nos no ta responsabel pa e debe na DIMP. Nos no ta responsabel pa decisionnan financiero di compania. Nos no ta responsabel pa falta di bus ”, segun e carta. 

E carta ta cera cu un yamada directo na Gobierno pa no sigui cu promesa general, sino pa presenta “respuesta concreto, fecha concreto y accion”.

E trahadornan ta enfatisa cu sin bus cu ta funciona no tin transporte publico, pero cu sin personal tampoco e sistema por funciona: “Nos ta importante tambe.”

Cu e carta habri, e personal ta pone presion riba Gobierno y Arubus N.V. pa finalmente aclaria con y na ki momento lo atende e asunto di salario, mientras e compania ta sigui enfrenta reto financiero y operacional.

E pregunta awo ta si Gobierno lo responde cu un calendario y plan concreto, of si e trahadornan — despues di mas di dies aña di espera — lo bolbe queda sin claridad tocante nan posicion y futuro dentro di transporte publico di Aruba.