Hulanda ta invita Hulandesnan na Aruba pa registra pa eleccion di Senado

ORANJESTAD /DEN HAAG – Hulandesnan cu ta biba na Aruba y cu kier participa indirectamente den composicion di Eerste Kamer (Senado) di Hulanda, mester registra pa e eleccion di Kiescollege Niet-Ingezetenen. E yamada a wordo haci pa Gemeente Den Haag, cu ta encarga di maneha registro di votadornan Hulandes cu ta biba pafor di Hulanda.

E eleccion lo tuma luga dia 17 di maart 2027 y ta brinda Hulandesnan cu ta biba den exterior, incluyendo Aruba, e oportunidad pa influencia indirectamente ken ta ocupa asiento den Senado Hulandes.

Segun Gemeente Den Haag, hopi Hulandes cu ta biba pafor di Hulanda ya ta registra pa vota den eleccionnan di Tweede Kamer y Parlamento Europeo, pero esaki no ta significa cu nan automaticamente ta registra pa e Kiescollege Niet-Ingezetenen. Pa participa den e eleccion aki, ta necesario haci un registro separa.

Personanan cu completa nan registro prome cu 1 di december 2026 lo ricibi un documento di voto pa correo na mitar di december automaticamente. E fecha limite oficial pa registra ta 3 di februari 2027.

E Kiescollege Niet-Ingezetenen ta consisti di representantenan escogi door Hulandesnan cu ta biba den exterior. Despues di eleccion, e miembronan escogi lo reuni na Den Haag dia 24 di mei 2027 pa emiti nan voto pa escoge e miembronan di Eerste Kamer.

Hulandesnan na Aruba cu registra pa e Kiescollege ta conserva tambe nan derecho di voto pa eleccionnan di Tweede Kamer y Parlamento Europeo.

Registro y cambionan di direccion of dato di contacto por wordo haci online via e portal oficial pa votadornan Hulandes den exterior.