Rainbow Warriors ta pidi mas inversion den infrastructura pa bicicleta y e-bikes na Aruba

ORANJESTAD – Na ocasion di Dia Mundial di Bicicleta, celebra dia 3 di juni, Rainbow Warriors Core Foundation a enfatisa e importancia di ciclismo como medio di transporte sostenibel, economico y saludabel. Segun e fundacion, e uso di bicicleta y e-bikes por contribui na reduccion di contaminacion, mehor salud publico y un sistema di transporte mas sostenible.

E tema mundial pa 2026, “Ciclismo pa un Futuro Sostenibel”, ta enfoca riba reduccion di dependencia riba vehiculonan cu ta usa combustibel fosil, promocion di movilidad activo y creacion di infrastructura mas sigur pa ciclista y peaton.

Segun e fundacion, Aruba ainda tin reto importante den e area aki. Nan ta argumenta cu proyectonan grandi manera Green Corridor y Watty Vos Boulevard no a duna suficiente atencion na carrilnan pa bicicleta ni na seguridad di ciclistanan y peatonnan.

E comunicado tambe menciona preocupacion tocante e regulacion di e-bikes y e-scooters. Segun e fundacion, e leyinan actual di trafico ta anticua y no ta adapta na e categorianan nobo di transporte electrico. Nan ta referi na e reciente decision judicial den e caso di e-bikes y e-scooters, unda corte a determina cu confiscacionnan a wordo haci ilegalmente.

Rainbow Warriors Core Foundation ta pidi adaptacion di ley y politica publico pa permiti un uso seguro y regula di bicicleta, e-bikes y e-scooters. Segun e organizacion, esaki lo yuda reduci emisionnan di carbono, mehora movilidad y promove un estilo di bida mas saludabel.

E fundacion a anuncia cu lo publica un informe cu recomendacionnan legal y practico pa facilita integracion di bicicleta, e-bikes y e-scooters den sistema di transporte di Aruba, manteniendo seguridad vial como prioridad principal.