Wever-Croes: “RvS ta confirma cu HOFA ta limita autonomia di Aruba”

ORANJESTAD – Lider di partido MEP, Evelyn Wever-Croes, a reacciona rapidamente pa Noticiacla dialuna mainta riba e conseho emiti pa Conseho di Estado di Reino (Raad van State) tocante e propuesta di Ley Reino HOFA. Segun Wever-Croes, e conseho ta confirma e preocupacion principal cu MEP, PPA, diferente sindicato y miles di ciudadano a expresa durante e debate riba e ley.  “Mi a repasa e conseho di RvS liher aworaki y mi ta satisfecho cu e conseho, paso e ta pone punto final na e discusion tocante si HOFA ta limita nos autonomia,” Wever-Croes a declara.

HOFA TA LIMITA AUTONOMIA DI ARUBA STRUCTURALMENTE

Segun e ex-prome minister, tanto Conseho di Estado (RvS) como Conseho Asesor di Aruba (RvA) a conclui cu e ley implica un limitacion structural di autonomia di Aruba. “E discusion awor a caba. E conclusion di RvS y RvA ta cu HOFA ta limita autonomia di Aruba,” el a afirma.

POSICION POLITICO 

Wever-Croes a indica cu e posicion cu MEP, PPA, parlamentarionan manera Mike de Meza di AVP, sindicatonan y mas cu 10 mil firmante a defende durante e debate, awor ta haya respaldo den e observacionnan di e consehonan asesor. Segun e, e pregunta principal no ta mas si autonomia ta wordo limita, sino si e limitacion aki ta un condicion razonabel cu Hulanda por exigi den intercambio pa acceso na financiamiento cu interes mas abou. “RvS tambe ta confirma cu Aruba ta bay financieramente bon. Pues e pregunta awor ta si ta husto pa Hulanda exigi un limitacion di autonomia pa baha interes di aproximadamente 6.9% pa 3.4%,” Wever-Croes a argumenta.

PREOCUPACION TOCANTE E “EXIT REGELING”

Otro punto importante menciona pa e lider di MEP ta e mecanismo pa Aruba eventualmente sali for di HOFA. Segun Wever-Croes, tanto RvS como RvA ta enfatisa importancia di un bon “exit regeling” (regulacion di salida). E la señala cu Raad van Advies di Aruba a bay mas leu ainda den su critica, señalando cu Aruba no por dicidi unilateralmente pa pone fin na e sistema di supervision. “Actualmente ta Hulanda mester duna permiso. Esaki ta crea duda tocante si e mecanismo di salida ta suficientemente fuerte. Y sin un bon exit regeling no por papia di voluntariedad verdadero, y sin voluntariedad no por tin consenso real,” el a expresa.

MEP TA PIDI RECONSIDERACION DI HOFA

Wever-Croes a haci un yamado na Gobierno di Aruba pa reevalua e trayectoria actual di HOFA y pa reinicia e discusion, tanto na Aruba como den Hulanda. Segun e, e situacion financiero actual di Aruba ta mustra cu e pais a recupera significativamente durante e ultimo añanan, cu nivel di debe nacional a baha y cu resultado presupuestario positivo. “Nos ta conclui cu, mirando e situacion financiero actual di Aruba, no ta husto pa exigi di Aruba entrega autonomia pa logra un interes mas abou,” Wever-Croes a declara.

E lider di MEP ta considera cu e conseho di Conseho di Estado a habri un capitulo nobo den e debate riba HOFA, cu segun e, lo centra menos riba e pregunta si autonomia ta wordo afecta, y mas riba si e limitacion di autonomia ta proporcional y hustificabel den e circunstancianan actual di Aruba.