Sindicatonan ta menaza cu welga di personal di seguridad na Schiphol

SCHIPHOL – Personal di seguridad na aeropuerto di Schiphol por bay den welga despues cu sindicato CNV y FNV a declara cu negociacionnan cu aeropuerto y companianan di seguridad no a trece suficiente mehoracion den condicionnan di trabou.

Segun e sindicatonan, e cambio reciente for di cinco pa tres compania di seguridad a resulta den mas presion laboral, horario irregular, menos posibilidad pa vacaciones y pausa mas cortico. Nan ta bisa cu hopi empleado no por ni tuma un descanso of bay baño na tempo.

CNV y FNV ta exigi pausa mas efectivo, mas tempo di descanso entre turno, mihor planificacion di vacacion, mas personal femenino den control di seguridad, un protocolo pa calor y garantia cu empleado por wordo reemplasa pa un bishita na baño den 15 minuut.

E sindicatonan lo consulta cu nan miembronan e siman aki riba posible accionnan colectivo, incluyendo un posible welga, pero nan ta laga porta habri pa sigui negocia si Schiphol presenta un propuesta concreto.