Campaña di limpiesa a colecta mas cu 211 ton di sushi

ORANJESTAD – E campaña nacional di limpiesa di Gobierno di Aruba a resulta den un exito, cu mas cu 211 ton di sushi colecta te cu diasabra atardi. E cifra ta basa riba 131 container y ainda no ta inclui e material entrega na DOW, AWSS y Daltra, loke ta nifica cu e total final lo ta mas halto.

Miles di residente, famia, empresa, team deportivo y voluntario a participa den e accion, yena e containernan mas lihe cu tabata calcula. Segun Prome Minister Mike Eman, e reaccion di comunidad a supera tur expectativa y a confirma cu tin necesidad pa organiza mas edicion di e campaña.

Gobierno lo evalua e operacion pa mehora e organizacion y prepara futuro campaña di limpiesa.