ATA: Apoyo local pa turismo ta baha mientras preocupacionnan ta crece

ORANJESTAD – Mayoria di residente ainda ta positivo tocante turismo, pero e apoyo pa e sector ta mustra un tendencia descendente. Esey ta un di e señalnan importante cu Aruba Tourism Authority ta observa den su encuestanan entre residentenan, mientras preocupacion tocante infrastructura, costo di vivienda, naturaleza y distribucion di beneficio turistico ta aumenta.

CEO di ATA Ronella Croes a revela durante un presentacion pa prensa dialuna durante e celebracion di Dia di Prensa, cu nan ya a haci tres “Local Resident Sentiment Surveys” y ta preparando e di cuatro pa e aña aki.

E resultadonan ta mustra un imagen cu mester haya atencion.

Mayoria di hende ainda ta contento cu turismo, pero e porcentahe di residente cu ta positivo tocante e industria a baha.

Entre e preocupacionnan cu ATA ta identifica tin presion riba e , costo di vivienda pa residentenan local, falta di proteccion suficiente di naturaleza, preservacion di cultura y e sentimiento entre algun residentenan cu nan no ta sinti suficientemente e beneficio economico di turismo.

E ultimo punto ta particularmente importante. Aruba por registra cifranan fuerte di entrada y haya evaluacion positivo di instancianan internacional, pero si parti di comunidad no ta sinti e progreso den nan propio calidad di bida, e exito turistico no ta completo.

Croes a enfatisa cu turismo responsabel no por wordo construi solamente mirando kico bishitante kier. Opinion di residentenan mester forma parti integral di planificacion.

ATA tambe a haci un encuesta entre alrededor di 7.000 biahero internacional. Mas cu 90% a indica cu un maneho responsabel di turismo ta importante ora nan ta scoge un destino. Sinembargo, solamente alrededor di un cuart parti a bisa cu nan ta haya suficiente informacion tocante con nan por contribui positivamente durante nan bishita.

Esey ta laga ATA cu otro reto: no solamente atrae e tipo di bishitante cu Aruba kier, pero educa e bishitante con pa comporta y contribui na un forma cu ta beneficia e isla.

E mensahe principal ta cla: turismo por sigui ta motor economico di Aruba, pero pa e modelo keda sostenibel, residente mester sinti cu e industria tambe ta traha pa nan.