Mike de Meza ta retira su disponibilidad pa bira minister

ORANJESTAD – E pregunta cu durante ultimo simannan tabata domina politica Arubano finalmente tin un contesta. Mike de Meza por eventualmente bira minister (si e lo a pasa e screening), pero e no kier bira minister bou di e rumbo actual di Gabinete AVP-FUTURO. E Parlamentario di AVP a informa Minister Presidente Mike Eman cu e ta retira su disponibilidad pa un nombramento ministerial, cu Rijkswet HOFA como un di e motibonan principal pa su decision. E portal 24ora.com tabata e prome pa raporta e informacion aki dialuna mainta. 

CIERE DI CAPITULO

E decision ta cera un capitulo cu durante mas cu un aña a mantene tanto De Meza como Gobierno den incertidumbre. Pero, mes momento, e por habri un problema politico nobo y posiblemente mas delicado: con AVP y FUTURO lo maneha un parlamentario prominente di coalicion cu publicamente ta opone un elemento importante di rumbo di Gobierno.

Noticiacla a señala e dilema aki ya anteriormente. Dia 12 di augustus Ministerio Publico a confirma cu e caso penal contra De Meza y su casa a wordo cera despues di pago di un transaccion di Afl. 2.500. E caso pa Corte a wordo retira y e obstaculo cu tabata para den caminda di un posible nombramento ministerial a desaparece.

Esey a cambia e pregunta politico completamente. Ya e no tabata: Mike de Meza por bira minister? E pregunta a bira: Mike de Meza ainda kier bira minister?

Minister Presidente Mike Eman mes a confirma na e momento ey cu De Meza a pidi algun dia pa reflexiona riba su futuro. Noticiacla despues a splica cu e posicion di De Meza contra HOFA y su peticion pa pueblo tin un palabra den e asunto cu por pone e den conflicto cu responsabilidad colectivo di un gabinete cu a acepta HOFA como parti di su rumbo politico.

HOFA BIRA E LINEA CU DE MEZA NO KIER CRUZA

Segun e carta di De Meza fecha 24 di augustus, despues di deliberacion cu su famia y personanan cerca di dje, el a dicidi cu e no por acepta responsabilidad ministerial bou di e circunstancianan actual. (Mester bisa cu Noticiacla independientemente no a mira e carta pa confirma e contenido di e declaracion ey). 

Central den su razonamento ta HOFA, e consensusrijkwet relaciona cu supervision y sostenibilidad di finansa publico. De Meza ta considera cu e ley ta toca  autonomia financiero y presupuestario di Aruba directamente y cu pueblo Arubano mester tin un palabra decisivo prome cu pais acepta un limitacion di tal magnitud.

Pa De Meza, e asunto no ta solamente tecnico of financiero. E ta presenta esaki como un cuestion di principio politico y autonomia, referiendo na e posicion historico di AVP y na e lucha di generacionnan anterior pa e status autonomo di Aruba dentro di Reino.

Su conclusion ta cu, como minister, e lo mester carga responsabilidad colectivo pa decisionnan di Gabinete. Si e fundamentalmente no ta di acuerdo cu un di e direccionnan principal di Gobierno, e no ta considera correcto pa ocupa un asiento den Consejo di Minister.

DI OBSTACULO HUDICIAL PA DIFERENCIA POLITICO

E contraste ta notable. Dia 11 di augustus fraccion di AVP ainda a felicita De Meza publicamente despues cu el a bira ministeriabel atrobe y a expresa confianza den su experiencia y capacidad. Menos cu dos siman despues, e mes, esta De Meza ta cera e porta pa Gabinete. Esaki ta haci cu e caso ya no ta uno di screening, Ministerio Publico of elegibilidad. E problema cu resta ta esencialmente politico.PARLAMENTARIO SO Y NO MINISTER

De Meza ta keda parlamentario di AVP. E posicion ey ta dun’e mas libertad pa expresa su opinion y eventualmente vota riba HOFA sin e obligacion di responsabilidad colectivo cu un minister tin. Precisamente esaki por bira e siguiente punto di tension. Si Gobierno AVP-FUTURO sigui adelante cu HOFA, un miembro prominente di fraccion AVP por termina frontalmente contra un punto importante di politica di e mes coalicion.

E DECISION TA CLA; E CONSECUENCIA AINDA NO

Pa Mike de Meza, despues di lunanan di lucha pa elimina e obstaculonan rond di su candidatura, e ironia politico ta completo: ora finalmente e por bira minister, e ta scoge pa no bira minister.

Pa Mike Eman y Gabinete AVP-FUTURO, sinembargo, e historia no ta termina aki. Gobierno mester determina awor kende lo ocupa e cartera cu originalmente tabata destina pa De Meza, pero e pregunta mas grandi ta : kico su decision ta bisa tocante cohesion dentro di AVP y relacion cu FUTURO.

Noticiacla a adverti anteriormente cu e silencio prolonga rond di De Meza tabata alimenta especulacion riba un division interno y stabilidad politico. Awe tin claridad riba De Meza.

Pero posiblemente, e claridad ey ta habri un pregunta mas grandi: si HOFA a resulta suficiente pa un figura importante di AVP rechasa un puesto ministerial, con profundo e diferencia riba HOFA realmente ta dentro di coalicion? Noticiacla mientrastanto a lansa un encuesta awe mainta riba e tema di HOFA. Pa wak e encuesta, por click AKI.