Alerta pa posible manipulacion di partidonan den Mundial 2026

MADRID/ZÚRICH – Varios partido di Mundial FIFA 2026 ta bou di atencion despues cu un informe a pone alerta riba posible manipulación di partido y movimento sospechoso den apuesta (betmento) deportivo.

Segun medio frances RMC Sport, un informe di Conseho di Europa a registra varios alerta relaciona cu partido durante e Mundial. Entre e situacionnan menciona tin apuesta di mas cu US$4,5 miyon riba un empate entre Spaña y Cabo Verde prome cu e partido, un carchi cora den e encuentro entre Surafrica y Mexico, y un revision di VAR cu a dura varios minuut durante e partido entre Spaña y Arabia Saudita, unda un gol di Ferran Torres finalmente a wordo anula.

FIFA, sinembargo, a bisa cu te awor no tin ningun evidencia cu ta indica cu algun partido a wordo manipula. Segun e organisacion, e informe ta solamente un recopilacion di alerta y un recomendacion pa fortalece e mecanismonan cu ta proteha integridad di e competencia.

Otro medio internacionalnan ta informa cu durante e Mundial a wordo emiti shete "alerta hel" pa posible irregularidad den apuesta deportivo, pero no tin informacion confirma cu tin investigacion formal riba otro partido.

Te cu awor, no a presenta prueba concluyente cu ta confirma cu algun encuentro di Mundial 2026 a wordo regla.