CBS: Costo di bida na Aruba a subi 1.1%; Nivel di subsistencia ta yega Afl. 5.602

ORANJESTAD – Segun e raportahe di Central Bureau of Statistics Aruba (CBS) pa maart 2026, e Consumer Price Index (CPI) di Aruba a subi cu 0.7% compara cu februari 2026. Compara cu maart 2025, inflacion ta na 1.1%, mientras inflacion promedio riba ultimo 24 luna ta keda relativamente abou, na 0.2%.

E sector cu mas a influencia e cambio mensual tabata “Household operation”, cu a baha 5.2% y a reduce e CPI cu 0.46 punto porcentual. Na otro banda, “Clothing and footwear” a registra e subida mas grandi den maart, cu 12.5%. Tambe “Transport” a subi 2.8%, principalmente pa motibo cu prijs di gasoline a aumenta 4.6% y diesel 4.4%. Water y electricidad no a registra cambio di prijs den maart 2026.

Riba base anual, prijsnan di “Restaurants and hotels” a subi 5.3%, “Communications” 3.4% y “Food and non-alcoholic beverages” 3.1%. Den cuminda, e grupo “Food & catering services” a subi 3.3% den ultimo 12 luna. Berdura a registra e aumento mas fuerte cu 9.1%, mientras “potatoes and other tubers” a baha 7.2%.

Un punto importante den e raportahe ta e nivel di subsistencia. Pa un famia di dos adulto y dos mucha, e suma necesario pa cubri necesidadnan basico a subi di Afl. 5.507 na maart 2025 pa Afl. 5.602 na maart 2026, un aumento di Afl. 95. Pa un adulto so, e nivel di subsistencia ta Afl. 2.668, mientras salario minimo ta Afl. 2.007, dejando un deficit di Afl. 661.

CBS ta mustra cu, aunke inflacion general ta relativamente limita, costo basico di bida ta sigui pone presion riba casnan na Aruba.