- Gobierno Hulandes ta pidi ciudadano Hulandes na Venezuela pa registra urgentemente
- Thomas Domhoff ta huramenta como presidente nobo di Banco Central di Aruba
- Yiu homber di victimanan di accidente fatal: “Nos no ta pidi venganza, nos ta exigi husticia”
- Yiu muher di victima di accidente fatal ta kibra silencio:“Mi mama a muri dilanti di mi wowonan”
- OM: Ex-manager di dos bar haya culpabel di traficacion di hende
- Gobierno Hulandes ta pidi ciudadano Hulandes na Venezuela pa registra urgentemente
- Thomas Domhoff ta huramenta como presidente nobo di Banco Central di Aruba
- Yiu homber di victimanan di accidente fatal: “Nos no ta pidi venganza, nos ta exigi husticia”
- Yiu muher di victima di accidente fatal ta kibra silencio:“Mi mama a muri dilanti di mi wowonan”
- OM: Ex-manager di dos bar haya culpabel di traficacion di hende
Thomas Domhoff ta huramenta como presidente nobo di Banco Central di Aruba
ORANJESTAD – Banco Central di Aruba (CBA) a drenta oficialmente den un fase nobo di liderazgo cu e huramentacion di su presidente nobo, Thomas Domhoff, cu a tuma lugar riba 25 di juni 2026 na Cas Ceremonial di Gobernador. E ceremonia a wordo presidi door di Gobernador di Aruba, Su Excelencia Alfonso Boekhoudt, y tabata atendi tambe door di Minister di Finansa, Asuntonan Economico y Sector Primario, Geoffrey Wever, miembro di Raad van Commissarissen, ehecutivonan di Banco Central y familiar di Domhoff.
Segun Minister Wever, e nombramento di Domhoff a sigui un proceso amplio, independiente y transparente, conduci door di e Raad van Commissarissen di Banco Central di Aruba bou di presidencia di Arie Swaen. Durante e proceso, e conseho a haci un evaluacion completo di diferente candidato, cu apoyo di un experto externo pa defini e perfil ideal pa e posicion.
A base di e evaluacion profesional, Raad van Commissarissen a recomenda Thomas Domhoff como e candidato cu mas experiencia y capacidad pa guia Banco Central den e siguiente fase di su desaroyo. Siguiendo e recomendacion ey, Minister Wever a formalisa su nombramento pa un periodo di cinco aña.
Domhoff ta aporta mas di 30 aña di experiencia den sector financiero, bancario, agricola y educacional, tanto den Caribe Hulandes como internacionalmente. Entre e diferente posicionnan ehecutivo cu el a ocupa, e mas reciente tabata como CEO di GI-RO Settlement Holding N.V. (GSH) na Corsou.
Minister Wever a expresa su confiansa cu e amplio experiencia, vision strategico y enfoke riba innovacion y desaroyo di talento humano di Domhoff lo fortalece e papel di Banco Central den mantene e estabilidad financiero di Aruba y proteha e confianza den e florin Arubiano.
“Banco Central ta un di e institucionnan mas importante pa nos economia. Pa e motibo ey, nombramentonan di e nivel aki mester basa riba merito, experiencia y un proceso completamente independiente y transparente,” a declara Minister Wever.
E cambio di liderazgo ta marca e final di un periodo historico pa Banco Central di Aruba. Durante casi 20 aña, Jane Semeleer a ocupa e posicion di presidente, convirtiendose den e prome hende muhe cu a lidera e institucion. Durante su mandato, Semeleer a guia Banco Central den periodonan di gran reto economico internacional y a hunga un papel importante den mantene e stabilidad di e florin Arubiano.
Minister Wever a expresa tambe su reconocemento na Miriam Gonzalez, cu a fungi como presidente interino despues di e salida di Semeleer. Hunto cu director Prakash Mungra y henter e ekipo profesional di Banco Central, Gonzalez a guia e institucion durante e periodo di transicion cu estabilidad, profesionalismo y compromiso.
Thomas Domhoff lo cuminza oficialmente cu su funcion como presidente di Banco Central di Aruba na 1 di juli 2026.
Na final, Minister Wever a desea e presidente nobo hopi exito den e responsabilidad cu e ta asumi.
“Mi tin plena confiansa cu, hunto cu e ekipo profesional di Banco Central di Aruba, sr. Domhoff lo sigui fortalece e institucion y contribui na un futuro financiero solido pa Aruba,” a conclui Minister Wever.