Yiu homber di victimanan di accidente fatal: “Nos no ta pidi venganza, nos ta exigi husticia”

ORANJESTAD – Un di e yiunan di e dos victimanan cu a perde nan bida den e accidente fatal di hit and run di 4 di januari 2026 , Edwin Willems, a haci un apelacion emocional na husticia y na e comunidad durante un conferencia di prensa diamars mainta. Segun nan, e caso no ta trata di busca venganza, sino di logra cu husticia wordo haci pa e dos persona inocente cu a perde nan bida y pa evita cu tragedianan asina lo repeti den futuro.

NO KIER DISCULPA

Durante su declaracion, e yiu en cuestion a bisa cu e no ta interesa den un disculpa despues di tur loke a pasa. Segun e, durante e ultimo seis luna nunca a sinti ningun expresion sincero di arrepentimento of empatia for di otro banda. El a bisa cu, den su opinion, e declaracionnan publico cu a wordo haci a pone mas enfasis riba defensa di e sospechoso cu riba e dolor di e victimanan y nan familia.

MAS DOLOR Y INDIGNACION 

Segun e, e manera cu diferente declaracion a wordo haci den medio di comunicacion solamente a provoca mas dolor y indignacion den comunidad. El a expresa cu, na su opinion, no a tende ningun señal di berdadero arepentimento pa e dos bida cu a wordo perdi den e accidente. E familiar a pone enfasis cu e victimanan ta esnan cu a perde nan bida y cu e familianan ta esnan cu lo carga e dolor pa resto di nan bida. El a relata cu e falta di e dos sernan keri ta sigui afecta tur miembro di famia, incluyendo mucha chikito cu tabata comparti tur momento cu nan wela y awor tin cu crece sin su presencia.

DAÑO EMOCIONAL

Segun e yiu homber, e daño emocional cu e tragedia a causa no por wordo midi. El a bisa cu e famia entero a mester busca apoyo profesional pa por enfrenta e trauma cu e accidente a laga atras. Durante su intervencion, e familiar tambe a expresa su gratitud na Ministerio Publico y na e fiscalnan encarga cu e investigacion. Segun e, e investigacion a wordo conduci di un manera serio y profesional y nan tin confiansa cu e proceso hudicial lo sigui su curso conforme cu lei. El a expresa e speransa cu e caso lo marca un punto di cambio na Aruba. Segun e, e isla no por sigui tolera accidente fatal causa door di chauffeur irresponsabel cu despues no ta  enfrenta e consecuencianan apropia. “Nos no ta celebra loke a pasa,” el a bisa. “Nos ta lamenta e tragedia profundamente. Pero nos kier pa Aruba manda un mensahe cla: un hende cu causa un accidente asina serio no por simplemente sigui cu su bida manera si nada no a pasa.” Segun e familiar, den e pasado Aruba a conoce diferente accidente fatal cu a causa hopi sufrimento pa famianan. Precisamente pa motibo di esey, nan ta considera cu e momento a yega pa manda un señal fuerte cu irresponsabilidat den trafico no lo wordo tolera.

HACI HUSTICIA PA HONRA MEMORIA DI VICTIMANAN

Na final di su declaracion, e familiar a expresa cu nan unico deseo ta cu husticia wordo haci, no solamente pa honra memoria di e dos victimanan, sino tambe pa proteha futuro victimanan potencial. “Nos no kier cu ningun otro familia pasa door di e dolor cu nos ta biba awe. Esey ta nos unico deseo.”