Yiu muher di victima di accidente fatal ta kibra silencio:“Mi mama a muri dilanti di mi wowonan”

ORANJESTAD – Seis luna despues di e accidente fatal di hit and run cu a cobra e bida di Josely Vasquez González y su esposo Carlos David Diyles na altura di e brug di Renaissance, un di nan yiunan Yhoely Willems,  a kibra su silencio pa comparti e dolor cu su familia ta carga te awe. Den un conferencia di prensa, e yiu muhe, cu tambe a resulta herida den e accidente, a bisa cu despues di tende e declaracionnan di familiar di e sospechoso un dia prome, a sinti cu tabatin momento pa e comunidad tende tambe e historia di e victimanan.

E ACCIDENTE

Segun e yiu, e anochi di 5 di januari 2026 tabata un momento cu lo cambia su bida pa semper. El a relata cu su mama, padrastro, su esposo y e mes tabata hunto na momento cu e accidente a sosode. El a bisa cu tanto e como su esposo a resulta herida y a mester ricibi tratamento medico, mientras su mama y padrastro no a sobrevivi e impacto. "Nos gran error tabata cu nos a confia den un chauffeur irresponsabel," el a bisa.

INVESTIGACION 

El a declara cu durante e ultimo seis luna, su familia a scoge pa no papia publicamente pa permiti Ministerio Publico haci su investigacion cu trankilidad. Sinembargo, despues cu diferente declaracion a wordo haci den medio di comunicacion for di otro banda, nan a considera cu e pueblo tambe mester tende e posicion di e famia di e victimanan.

CONTRADECI INFORMACION 

Durante su intervencion, el a contradici informacion cu anteriormente a circula den medio di comunicacion. Segun e, nunca ningun miembro di famia di e sospechoso a busca contacto cu nan pa expresa condolencia of pidi disculpa. Tambe el a rechasa afirmacionnan cu e famia di e sospechoso a ofrece pa paga gastonan relaciona cu e tragedia. "Publicamente mi kier bisa cu esey no ta berdad. Nunca nos a haya contacto cu nan," el a declara.

COMENTARIO RIBA RED SOCIAL

E yiu muhe a bisa cu uno di e cosnan cu mas a causa dolor na su famia, ta e diferente comentario cu a circula riba rednan social y den programa di radio y television, unda, segun e, a trata di minimalisa e gravedad di loke a pasa. El a bisa cu su familia semper a laga Ministerio Publico haci su trabou y nunca a desea influencia e investigacion.

ESCENA GRAFICO HORIBLE EXPERENCIA 

Cu emocion visible, el a relata e escena cu lo keda graba den su memoria pa resto di su bida. El a conta con e mes a mira su mama sin bida riba e acera y cu durante e caos a descubri cu un pia di su mama tabata separa di su curpa. Tambe el a mira su padrastro sin bida. "Esaki ta e trauma cu mi ta carga tur dia. E imagennan ey nunca lo laga mi," el a expresa.

NO MINIMALISA DOOR DI VICTIMA 

El a bisa cu comprende cu e sospechoso y su familia tambe por ta pasando door di un situacion dificil, pero a enfatisa cu e dolor di e victimanan tampoco por wordo minimisa. Segun e, dentro di dos luna e lo bira mama di su prome yiu, un momento cu su mama tabata sperando cu hopi alegria. Sinembargo, e alegria ey awor ta mezcla cu tristesa, pasobra su mama no lo por ta presente pa comparti e momento especial cu su nieto. "Mi mama semper tabatin e deseo di mira mi bira mama. E momento ey ta yega, pero e  no ta mas cu nos. Mi yiu nunca lo conoce su wela, mientras otro famia si por sigui abraza nan sernan keri," el a bisa.

Durante su declaracion, el a expresa tambe gratitud na e polis cu tabata presente e anochi di e accidente. Segun e, danki na e reaccion rapido di e agente, cu a logra nota e placa y descripcion di e auto sospechoso, autoridadnan a logra localisa e sospechoso mesun anochi. "Pa mi, e polis ey tabata un angel cu Dios a pone den nos caminda," el a bisa.

Na final di su mensaje, e yiu muhe a haci un apelacion na comunidad pa nunca combina alcohol cu stuur. "Mi ta suplica na tur hende: si bo a bebe, laga un otro hende stuur. Nunca mi a pensa cu mi lo mira mi mama muri dilanti di mi wowo. Mi no kier cu ningun otro familia pasa door di e dolor cu nos ta biba awe."

El a conclui bisando cu, despues di seis luna, su famia ta sigui confia den e sistema hudicial y den Ministerio Publico. Segun e, nan unico deseo ta cu husticia sigui su curso y cu finalmente e responsabilidad pa e tragedia di e anochi di 5 di januari wordo determina conforme cu ley.