Aruba ta bira un di e destinacionnan mas fuerte pa Wingo durante temporada di zomer

ORANJESTAD – Aerolinea Wingo ta spera di transporta mas cu 703.000 pasahero durante temporada halto di juni y juli 2026, cu ta representa un crecemento di 15% compara cu mesun periodo na 2025. Dentro di e proyeccionnan internacional, ruta entre Aruba y Medellin ta figura entre e destinacionnan cu mas demanda.

Segun compania, Aruba ta haya un posicion importante den expansion regional di Wingo, especialmente cu dos ruta nobo cu lo fortalece conectividad entre Aruba y Colombia. For di 17 di juni, Wingo lo cuminsa cu vuelo seasonal directo entre Bucaramanga y Aruba, cu dos frecuencia pa siman, diaranson y diasabra. Despues, dia 9 di juli, compania lo añade tambe ruta directo entre Barranquilla y Aruba, igualmente cu dos vuelo semanal.

Wingo a indica cu e movemento aki ta parti di un strategia pa amplia opcionnan di biahe den Caribe y Latinoamerica, ofreciendo vuelo directo, confiabel y di prijs abou. E compania ta enfatisa cu hopi di e rutanan nobo aki no tin competencia directo di otro aerolineanan.

Ademas di Aruba, Wingo lo habri conexionnan nobo entre Medellin y Jamaica, Guatemala y tambe entre Bogota y Valencia, Venezuela. Pero Aruba ta sigui destaca como un di e mercadonan cu mas crecimiento y demanda den region.

Vicepresidente comercial di Wingo, Jorge Jiménez, a expresa cu e compania kier brinda mas opcionnan pa vacacion, getaway y reunion familiar, mientras cu nan ta sigui fortalece nan red regional cu destinacionnan unico.