Aruba, Cancún y Punta Cana ta domina biahenan di verano; mericano ta sigui scoge Caribe

NEW YORK - Destinonan di Caribe manera Oranjestad, Cancún y Punta Cana ta sigui entre e destinoonan mas popular pa turista mericano durante verano di 2026. Esaki segun Carib Journal  ta sali for di datonan nobo di Allianz Partners, cu a analiza miles di reservacionnan di biahe pa periodo di 21 di mei te 8 di september.

Cancún a rankea como di dos destino internacional mas popular pa americano, solamente tras di Dublin. Punta Cana a termina na di cinco lugar mundialmente, mientras cu Oranjestad, Aruba a logra posicion numero seis. Montego Bay tambe a drenta top 10.

Expertonan ta bisa cu demanda pa Caribe ta keda extremadamente fuerte, apesar di prijs di ticket di avion y hotelnan cu a subi. Segun e reporte, total di reservacionnan di verano a aumenta cu 10% compara cu aña pasa.

Un factor importante ta cu hopi di e destinoonan aki tin grandi cantidad di resort “all-inclusive”, algo cu actualmente ta hopi popular entre biaheronan mericano. Aerolineanan manera American Airlines, JetBlue y Delta Air Lines a sigui añadi mas ruta y frecuencia pa Caribe, specialmente for di Florida y costa oost di Merca.

Aruba ta sigui destaca paso e isla ta considera un destino confiabel y activo henter aña. Un bentaha grandi pa Aruba ta cu e isla ta pafor di principal zona di horcan den Caribe, algo hopi importante pa turista durante temporada di verano. Ademas, Aruba tin conexionnan directo fuerte cu diferente ciudadnan grandi den Merca, incluyendo Miami, New York y Atlanta.

Turistanan ta aprecia tambe mezcla di playa, restaurante, casino, nightlife y clima estable cu Aruba ta ofrece. Area manera Palm Beach, Eagle Beach, Noord y centro di Oranjestad ta sigui atrae hopi visitante recurrente.

Cancún y Punta Cana, pa nan banda, ta domina pa nan cantidad enorme di resortnan all-inclusive y acceso facil for di decenan di ciudadnan mericano. Especialmente Punta Cana ta sigui crece rapidamente como uno di e mercado di resort mas grandi den Caribe.

Segun e analisis, mericano ta continua mira Caribe como uno di e opcionnan mas facil, sigur y comfortabel pa vacacion internacional, cu biahenan mas corto, mas buelo directo y menos complicacion compara cu biahenan largo pa Europa.