Hotelnan den Caribe ta sigui cresce fuertemente na 2026; Aruba entre destinacionnan cu mas desaroyo

MIAMI - Sector di hotel den Caribe ta sigui mustra resultado fuerte durante prome cuater luna di 2026. Segun cifranan nobo di compania di analisis hotelero STR, ocupacion di hotelnan, prijs di cuarto y entrada financiero di resortnan a subi considerablemente den region.

Luna di maart a resulta e luna mas fuerte te awor, cu ocupacion di hotelnan den Caribe alcanzando casi 80%, un aumento di 6,3% compara cu maart di 2025. Abril tambe a registra resultado positivo, cu ocupacion subi 5,8%.

Prijs promedio pa cuarto di hotel tambe a sigui subi. Durante maart, huespednan tabata paga promedio mas di 460 dollar pa nochi. Entrada pa cuarto disponibel, conoci como “RevPAR”, a mustra crecemento fuerte tambe, indicando cu hotelnan ta logra haya mas ganashi pa cada cuarto disponibel.

Den total, hotelnan den Caribe a genera mas di 3 biyon dollar den entrada di cuarto solamente durante luna di maart, un aumento di mas di 10% compara cu aña pasa.

Interesantemente, e crecemento aki ta bin mientras cu region ta sigui amplia su cantidad di hotelnan y cuartonan. Destinacionnan manera Aruba, Curaçao, The Bahamas, Jamaica y Dominican Republic ta mira continuo desaroyo di resortnan y proyecto turistico nobo.

Expertonan ta bisa cu demanda pa Caribe ta keda fuerte rumbo na temporada di verano, danki na mas buelonan for di Merca, Canada y Latinoamerica. Diferente aerolineanan grandi recientemente a añadi mas ruta y frecuencia pa destinacionnan caribe, specialmente paisnan cu sector di lujo y “all-inclusive” fuerte, manera Aruba.

Segun STR, na april 2026 tin mas di 2.000 propiedad di hotel y casi 268 mil cuarto registra den Caribe.