WZAK: Mas turista ta cambia hotel tradicional pa estadianan mas largo y estilo mas comfortable

MIAMI/ ORANJESTAD - Mas biaheronan actualmente no ta limita nan vacacion solamente na hotel tradicional. Asina un portal digital na Ohio, Merca 93.1 WZAK ta bisa. Pa vacacionnan mas largo, hopi hende ta scoge opcionnan cu ta duna mas sensacion di cas, mas flexibilidad y hasta ahorro di placa.

Aunke entrada di hotelnan mundialmente lo pasa 492 biyon dollar na 2026, industria di hotel tradicional ta haya mas competencia paso biaheronan ta busca experiencia mas comfortabel y personalisa.

Entre e opcionnan mas popular tin plataforma manera Airbnb y Vrbo, unda persona por huur un apartamento completo, cas of condo pa estadianan largo. Tambe tin “apartment hotel”, cu ta combina servicio di hotel cu comfort di un apartamento real.

Otro tendencia cu ta gana popularidad ta “co-living spaces”, unda biaheronan tin nan propio cuarto of studio, pero ta comparti cocina, gimnasio y otro espacionan comunal. Tin tambe hende cu ta practica “house sitting”, cuidando cas y mascota di otro hende pa por keda gratis durante nan biahe.

ARUBA TA SIGUI FABORITO PA TIMESHARE

E articulo ta menciona cu Aruba ta entre e destinacionnan cu famianan ta disfruta via sistema di “timeshare”, unda diferente propietario tin derecho di usa un resort durante cierto periodo di aña. Esaki ta permiti turista disfruta lugares manera Aruba y Hawaii sin mester cumpra un cas di vacacion completo.

Segun experto, tendencia di “slow travel” tambe ta contribui na e cambio aki. Mas persona ta scoge keda un luna of varios luna na un destino pa conoce miho cultura local y biba mas comfortabel. Tin biaheronan cu ta traha remoto of empresario cu ta usa e estadia largo pa explora eventual mudanza pa un otro pais.

Alternativanan pa hotel tradicional tambe ta ofrece experiencia unico manera “glamping”, estadia na finca, of biaha den RV y motorhome, cu ta combina transporte y alojamiento den un so opcion.

Especialmente pa destinacionnan turistico manera Aruba, e tendencia aki por representa un oportunidad grandi pa vacation rentals, apartmentonan y alojamiento alternativo cu ta ofrece experiencia mas local y comfortabel pa turista moderno.