JetBlue ta stop vuelo Newark-Aruba den medio di recortenan grandi

ORANJESTAD – Aerolinea JetBlue a anuncia cu lo stop su ruta entre Newark y Aruba como parti di un reorganisacion grandi den su red di vuelonan. Asina e portal simpleflying.com ta bisa. Aruba ta entre dies ruta cu e compania a dicidi corta mientras cu JetBlue ta enfoca mas riba rentabilidad y uso mas eficiente di su avionnan.

Segun analisis internacional, e ruta Newark-Aruba tabatin un ocupacion relativamente fuerte, cu mas cu 84% di e stoelanan yen den ultimo 12 luna. Sinembargo, JetBlue ta considera cu e ruta no tabata produci suficiente ganashi, especialmente debi na competencia fuerte cu United Airlines y e costo halto di opera for di aeropuerto di Newark.

Mientras JetBlue ta expande den Florida y otro destinacionnan den Caribe y Latinoamerica, e compania ta corta ruta cu no ta considera strategicamente rentable. E compania tambe ta enfrenta limitacion cu disponibilidad di avionnan y problema continuo cu motornan Pratt & Whitney.

Pa Aruba, e decision ta significa un opcion menos pa pasaheronan cu ta bula directamente entre Newark y Aruba cu JetBlue. United Airlines lo sigui como uno di e principal operadornan riba e ruta aki.