Banco Central di Aruba a mantene e reserva obligatorio pa banconan comercial na 12,5%

ORANJESTAD - Banco Central di Aruba (BCA) a dicidi durante e reunion di MPC di 27 di februari 2026 pa mantene e tasa di reserva obligatorio pa banconan comercial na 12,5% entrante 1 di maart 2026.

Puntonan principal:

1.        Reservanan adecua apesar di crecemento den credito

Te cu 23 di januari 2026, reservanan a surpasa substancialmente e normanan cu BCA ta mantene. Ademas, BCA ta anticipa cu e reservanan di divisa lo keda suficientemente adecua.

2.        Un inflacion abou

Na december 2025, e inflacion midi na final di luna contra e mesun luna di e aña anterior a permanece na un nivel relativamente abou di 0,4%. Riba un promedio anual e inflacion a alcansa 0,1%. 

3.        Incertidumbre mundial economico

E incertidumbre mundial na e momentonan aki, incluso e tensionnan geopolitico cu ta escala, por impacta e reservanan di divisa y inflacion, cu por causa desviacionnan for di e proyeccionnan actual cu ta fungi como e punto di salida (“baseline”).

BCA ta monitor indicadornan monetario y economico di cerca y lo ahusta su posicion di maneho monetario ora ta necesario pa mantene e tasa fiho di e florin na e dollar Mericano. 

Pa mas informacion por manda un email na: communications@cbaruba.org.