Aruba a mustra su aeropuerto digital y moderno na premier hulandes Rob Jetten

ORANJESTAD – Durante su bishita oficial na Aruba, Rob Jetten a ricibi un recorrido den Queen Beatrix International Airport, unda a mustra innovacion, digitalisacion y e sistema avanzado di frontera cu Aruba tin implementa.

E delegacion a mira di cerca e moderno sistema di maneho di ekipahe y e operacion di U.S. pre-clearance, cu ta permiti pasaheronan completa control di entrada pa Merca caba na Aruba. Tambe a destaca inversionnan den proyecto Gateway 2030, cu ta conecta digitalmente pasahero, documento y ekipahe pa aumenta siguridad y eficiencia.

Un otro punto importante tabata e presentacion di “3DXVerse”, un iniciativa tecnologico desarrolla hunto cu Union Europeo y diferente universidadnan y empresa Europeo. E sistema ta permiti biaheronan usa un “pasporte digital” y pasa door di e-gates usando reconocemento facial, reduciendo tempo di espera considerablemente.

Ademas di innovacion tecnologico, e proyecto tambe tin enfoke riba sostenibilidad, dando biaheronan informacion tocante nan impacto ambiental y opcionnan pa contribui na actividadnan ecologico local.

Segun e organizadornan, e recorrido a confirma posicion di Aruba como un hub moderno y strategico den Caribe, combinando tecnologia avansa, eficiencia y cooperacion internacional pa mehora experiencia di biahe.