Douane na Hulanda a intercepta 43 miyon cigaria ilegal den un luna

ROTTERDAM - Autoridadnan di douane na Hulanda a logra intercepta mas cu 43 miyon cigaria ilegal den solamente un luna. E mayoria di e cargamentonan a wordo descubri den containernan maritimo den haf di Rotterdam, hopi biaha cu yudansa di cacho specialisa. Te awor, por lo menos diez sospechoso a wordo aresta.

Segun douane, si e cigarianan tabata drenta mercado, estado hulandes lo tabata perde casi 17 miyon euro den impuesto di accijns. Na 7 di april, autoridadnan a haya mas cu 8,5 miyon cigaria ilegal den un container riba Maasvlakte. Un siman despues, otro 3,8 miyon cigaria a wordo descubri den un edificio comercial na Tiel.

Na final di april y cuminsamento di mei, autoridadnan a intercepta tres otro container cu miyonan di cigaria ilegal den haf di Rotterdam. Riba e documentonan oficial, e cargamentonan tabata figura como mercancia normal, pero investigadornan a descubre cu e cigarianan probablemente a bin for di Asia.

Douane y servicio investigativo fiscal FIOD, den cooperacion cu “Combiteam Smoke”, a sigui e cargamentonan prome cu confiscanan. Esaki a yuda autoridadnan localisa diferente punto di distribucion y identifica red criminalnan. Den un caso, casi 1,7 miyon cigaria ilegal a wordo confisca den un cas y tienda. Den otro operacion na Culemborg, ocho persona a wordo arresta y mas cu 10 miyon cigaria a wordo confiscá.

Autoridadnan ta sigui investigando di unda exactamente e cigarianan a bin y con e rednan criminal ta opera.