Aruba ta fortalece conexion cu Colombia: Wingo ta añadi dos ruta nobo pa e isla

ORANJESTAD – Aerolinea Wingo a anuncia dos ruta nobo pa Aeropuerto Reina Beatrix na Aruba, fortaleciendo ainda mas conexion entre Aruba, Colombia y mercado latinoamericano.

For di juni 2026, Wingo lo cuminsa un servicio temporal entre Bucaramanga y Aruba, cu dos buelo semanal durante verano. Ademas, for di juli 2026, compania lo lansa un ruta nobo entre Barranquilla y Aruba, cu lo opera tur aña cu dos buelo semanal.

Cu e adicion aki, Aruba awor lo tin conexion directo cu cinco ciudad den Colombia, fortaleciendo e relacion turistico y comercial cu e pais. Actualmente, Colombia ta representa aproximadamente 48% di capacidad total di asiento cu ta yega Aruba for di Latinoamerica.

Segun informacion comparti, e rutanan nobo lo añadi aproximadamente 9.500 asiento extra for di region durante temporada di verano.

Wingo actualmente ta representa alrededor di 17% di capacidad total di asiento latinoamericano pa Aruba, y e expansion aki ta confirma e importancia creciente di mercado latinoamericano pa turismo di Aruba.

Mientras Bucaramanga ta habri un mercado completamente nobo pa Aruba, e ruta di Barranquilla ta fortalece conexion cu costa caribeño di Colombia, cu ta mustra demanda constante pa bishita Aruba.