Turismo na Aruba a genera Afl. 5.6 biyon den 2025

ORANJESTAD – Aruba Tourism Authority (A.T.A.) a entrega su Rapport Anual 2025 na minister Wendrick Cicilia, revelando cu turismo na Aruba a sigui creciendo fuertemente durante 2025, cu mas cu 1.5 miyon bishitante di stay-over y entrada economico di aproximadamente Afl. 5.6 biyon.

Segun A.T.A., esaki ta representa un aumento di 7% den cantidad di bishitante y 8% den entrada compara cu 2024. Bishitantenan a gasta aproximadamente Afl. 550 pa dia durante nan estadia.

Un di e puntonan mas importante den e rapport ta e cambio di direccion strategico di A.T.A. pa un modelo di turismo mas responsable y sostenible. Den 2025, A.T.A. a lansa su plan multi-anual “MACS”, enfoca riba transicion di turismo tradicional pa turismo regenerativo, cu mas enfoke riba calidad di bida, preservacion di medio ambiente y beneficio pa comunidad local.

A.T.A. tambe a fortalece colaboracion cu diferente organisacion local y a sigui invirti den mehoracion di trails, area costero, espacio publico y sitionan cultural pa crea un experiencia mas balansa tanto pa residente como turista.

Ademas, e organisacion a cambia su strategia internacional di mercadeo cu e campaña “When you Love Aruba, It Loves You Back”, cu ta promove un turismo basa riba balor y impacto positivo, en bes di solamente volumen di turista.