Eurovisie Songfestival ta cuminza: cu Israel pero sin Hulanda

AUSTRIA – Eurovisie Songfestival ta cuminza awe anochi den Stadthalle na Austria, pero e biaha aki sin participacion di Hulanda. AVROTROS a decide pa no participa despues cu organizacion EBU a confirma cu Israel lo sigui participa den festival. Austria ta organisa e evento despues cu cantante JJ a gana anja pasa cu e cancion “Wasted Love”. Ta e di tres biaha den historia cu Austria ta organiza Eurovisie. Hulanda solamente dos biaha anteriormente no a participa den festival, pero esta biaha e decision ta politico. Tambe Spaña, Slovenia, Islandia y Irlanda a decide di no participa.

DIVISION ENTRE FANATICONAN

Entre fanaticonan di Eurovisie tambe tin division. Tin esnan cu ainda ta bay Austria como fanatico fiel, pero tin otro cu no kier mira festival paso Israel ta participa. Tambe tin un grupo cu no ta sigui festival paso Hulanda no ta participa. Apesar di e controversia, Hulanda ainda ta entre e paisnan cu a bende hopi carchi pa shownan y repeticionnan. Totalmente, mas cu 95.000 carchi a wordo bende. Un fan hulandes di 22 aña, Bowien Ravenhorst, a bisa cu hopi hende no ta compronde pakico e ainda ta bay. E a bisa cu e kier mustra cu no tur hende cu ta mira festival ta suporta Israel.

EVENTO CANCELÁ

Na Utrecht, un tradicion anual unda fanaticonan ta mira final riba pantaya grandi, a wordo cancela esaki debi na benta di carchi decepcionante y reaccionnan negativo online. Organisadornan a ricibi critica di ambos banda: algun hende ta bisa cu transmiti festival no ta correcto mirando situacion mundial, mientras otro ta bisa cu nan ta anti-semita paso nan a considera pa kita sonido durante actuacion di Israel. Apesar cu Hulanda no ta participa, NOS y NTR ainda lo transmiti semifinalnan y final di Eurovisie pa televidentenan hulandes.