JetBlue ta aumenta buelonan pa Aruba despues di salida di Spirit

ORANJESTAD – E compania aereoa JetBlue a anuncia cu durante e segundo mitar di 2026 e lo amplia su operacion na aeropuerto di Fort Lauderdale-Hollywood International Airport significativamente, despues di desaparicion di Spirit Airlines for di mercado.

Segun informacion publica, JetBlue lo inicia siete ruta nobo for di 9 di juli di 2026, mientras cu tambe lo aumenta frecuencia di buelonan riba seis ruta existente. Entre e destinacionnan cu lo beneficia directamente tin Aruba.

Pa ruta entre Fort Lauderdale y Aruba, JetBlue lo aumenta servicio for di tres buelo semanal pa siete buelo semanal, efectivamente convirtiendo e conexion den un servicio diario.

E expansion ta wordo mira como un paso importante pa mantene conectividad entre Aruba y Florida despues cu Spirit Airlines a stop su operacion recientemente debi na serio problema financiero. Spirit tabata uno di e companianan low-cost mas importante pa mercado Arubano, cu varios buelo semanal entre Florida y Aruba.

Ademas di e rutanan cu ta cuminsa na juli, JetBlue tin planea pa agrega cuatro ruta adicional durante oktober y november di 2026. Tambe tin expansion programa pa ruta entre Baltimore/Washington y San Juan.

E decision di JetBlue por representa un alivio parcial pa viajantenan y sector turistico Arubano, especialmente despues di preocupacionnan cu a surgi rond di perdida di opcionnan barato pa bula entre Aruba y Merca despues di colapso di Spirit Airlines.