Famia Real a celebra Dia di Rey na ciudad Dokkum den Friesland

DOKKUM - Famia Real Hulandes a termina nan bishita na Dokkum durante celebracion di Dia di Rey, unda nan a participa den diferente actividadnan tipico di Friesland, manera patinahe riba ijs y fierljeppen (salto cu palo).

Rey Willem-Alexander mes a subi bela di un boto tradicional, mientras prinsnan  Constantijn y Maurits a purba salto fierljeppen, aunke nan no a logra un salto perfecto. Tambe a mustra e deporte tradicional di kaatsen.

E Rey a recorda su participacion den e famoso Elfstedentocht na 1986, ora e la bishita Dokkum como hoben. Awor el a expresa cu el no kier a bay mas for di e ciudad y a gradici e poblacion den idioma Fries.

Manera den e Elfstedentocht, e famia a pasa pa diferente “stempelpostnan” y a topa personalidadnan manera deportistanan reconocí. Nan tabata bisti den colornan di bandera di Dokkum y a interactua cu publico, saka potret y participa den un quiz tocante Friesland, unda cu hasta tabatin un parti den Papiamento. 

Durante e evento tabatin un protesta chikito di republicanonan cu slogan “Willem e ultimo”, pero sin mayor impacto.

E ruta a sigui pasa pa un pista di ijs flotante, unda e Rey y Reina Máxima a patina hunto. Prinses Ariane tambe a subi riba ijs, aunke cu poco experiencia reciente.

Na final di e dia, e Rey a gradici organizadornan y habitantenan cu palabra “Tige tank” (masha danki). Durante un entrevista, Prinses Ariane a anuncia cu lo cuminsa studia Ingenieria Aeronautico y Espacial na TU Delft despues di su aña sabatico.