Gobierno hulandes lo bin cu leynan nobo di asilo den dos siman

PAIS BASHO – Prome minister Jetten a anuncia cu gabinete lo presenta dentro di dos siman propuestanan nobo pa limita e entrada di solicitantenan di asilo. Esakinan lo reemplasa e ley di medida di emergencia di asilo cu a wordo rechasa ayera den Senado.

Minister Van den Brink di Asilo y Migracion lo presenta un plan pa amplia e posibilidad pa declara stranhero “no deseable”, pa asina facilita deportacion di esnan cu no ta coopera cu nan salida di pais.

Tambe lo bin un propuesta pa elimina e multanan cu IND (servicio di inmigracion) mester paga ora un proseso di asilo ta dura hopi tempo. IND ta e entidad cu ta evalua peticionnan di asilo.

E reglanan nobo nacional lo suma na e reglanan mas estricto di pacto migratorio europeo cu lo drenta na vigor na juni. Ayera, Senado a rechasa varios punto, incluyendo e plan pa haci permanencia ilegal castigabel, pero den e mes ley tabatin tambe e eliminacion di e multanan pa IND.

CRITICA Y PROXIMO PASO

Jetten a pone culpa riba partido PVV, acusando nan di “sabotage politico” riba ley nan cu segun e nan mes a pidi durante tempo. E a bisa cu, apesar di e resultado, gabinete no lo laga un solo votacion para nan plan.

Curiosamente, su propio partido D66 tambe a vota contra, pero segun Jetten esaki tabata un acuerdo dentro di coalicion. E a bisa cu a haci esfuerzo pa convence senadornan cu tabata indeciso, pero no a logra.

Gobierno awor ta sigui dilanti cu plan nan nobo. “Hopi partido ya cansa cu situacion unda hende cu mester bai bek no ta haci esaki,” Jetten a declara.