Drama na Hulanda: Mayornan lo a hinca nan yiu muher menor di edad mata

BLERICK – Na Blerick, un bario di Venlo, un mucha muher menor a wordo mata cu cuchiu. Esaki a sosode den un cas na Elzenstraat, segun polis di Limburg. Segun bisiñanan, ta trata di un mucha di 13 of 14 aña cu nomber Nour, pero policia ainda no a confirma esaki.

Policia a detene un homber y un muhé, cu segun hendenan den bario ta habitantenan di e cas y posiblemente mayornan di e mucha.  

E notificacion di e incidente a drenta rond di 6:30 di mainta. E mucha a keda gravemente herida durante e atake y varios servicionan di emergencia, incluyendo un helicoptero medico, a wordo manda pa sitio. A pesar di tur esfuerso, e mucha a fayece. Area a wordo sera pa investigacion.

Un bisiña cu ta biba banda di e cas a bisa cu e ta shock pa loke a pasa. E mucha tabata ainda dia anterior na su cas pa hunga cu su yiu. “Tabata un mucha masha bon y amable,” e a bisa.

Segun e bisiña, tabatin problema entre mayornan di e mucha pa algun tempo caba. E homber tabata biba aparte, den un apartamento den e cura, y no mas den cas.

E bisiña no a tende nada durante e incidente pasobra e tabata den un soño profundo. “Si mi a tende algo, tal vez mi por a yuda,” e a bisa.

Tambe ta wordo bisa cu e homber tin un otro muhe na Marokko, cu kende e  tin yiunan. E famia tin dos otro yiu, unda uno ainda ta biba na cas.

E mucha tabata studia na Blariacumcollege na Blerick. E scol a describe su morto como un golpi grandi pa comunidad escolar. Lessionnan ta sigui, pero den forma adapta, y alumno cu no por participa por bai cas cu guia di mayornan. Scol ta prepara un luga di memoria pa e mucha.