Turismo di Curaçao ta crece cu 10%, Merca a bira mercado mas grandi

WILLEMSTAD – Curaçao a ricibi casi 80.000 turista di estadia den luna di maart, un subida di dies porciento compara cu mes periodo aña pasa. Cu esaki, demanda pa e isla ta keda fuerte, specialmente for di Merca, cu e luna aki a pasa Hulanda como mercado mas grandi. Segun cifranan di Curaçao Tourist Board, un total di 79.763 bishitante di estadia a yega na e isla. Mayoria di nan ta bishita pa vacacion y ta keda promedio casi ocho nochi. Turismo ta sigui aporta un contribucion estable na sectornan manera horeca, transporte y excursionnan.

MERCA

Merca tabata e mercado di origen mas importante den maart cu poco mas cu 24.000 bishitante, representando un crecemento di nuebe porshento. Hulanda ta sigui cu mas di 21.000 bishitante, pero a mustra un baha di cinco porshento. E baha aki, segun e oficina di turismo, ta wordo compensa pa crecemento den otro mercadonan Europeo, specialmente Alemania, unda e cantidad di bishitante a subi considerablemente.  Tambe ta destaca e subida for di Canada. Curaçao a ricibi 8.400 turista canadiense, un aumento di cuarenta porshento compara cu aña pasa.

E oficina di turismo ta papia di un desaroyo estable, pero ta enfatisa cu comportamiento di bishitantenan y crecemento ta wordo sigui di cerca, cu enfoke riba mantene un balansa entre entrada economico y capacidad di carga di e isla.