Conseho di Educacion: muchanan den Caribe Hulandes mester ricibi miho enseñansa

WILLEMSTAD – Conseho di Educacion a conclui cu sistema di enseñansa den Caribe Hulandes mester wordo mehora despues di un analisis riba Bonaire, Saba y Sint Eustatius. Segun e ‘Onderwijsraad’, e sistema hulandes no ta conecta suficientemente cu realidad di e islanan, unda enseñansa ta mas chikito y cu menos sosten debido na distancia grandi cu Hulanda. E conseho ta recomenda mas adaptacion na situacion local y tambe mas inversion financiero.

Muchanan mester wordo miho prepara pa estudio despues di scol, sea den Caribe of den Hulanda. Tambe dominio di idioma hulandes mester mehora pa facilita transicion pa educacion superior. Ademas, tin necesidad pa haci estudio den otro isla caribeño manera Aruba, Corsou, Sint Maarten y otro paisnan mas accesibel y conocí.

Onderwijsraad tambe a señala falta di estabilidad den personal di enseñansa. Como solucion, ta propone un sistema di rotacion cu maestro for di Hulanda, hunto cu miho guia pa docente nobo y mas cooperacion entre institucionnan educativo. Finalmente, conseho ta pidi cu gobierno tene mas cuenta cu realidad di e islanan ora di crea ley y politica, cu mas consulta cu gobernacion local.