Pisas: No tin keho formal contra ex minister Carlson Manuel apesar di acusacionnan

WILLEMSTAD – Contra ex-minister plenipotenciario Carlson Manuel no a wordo presenta ningun keho formal na Ministerio Publico. Esaki ta segun prome minister Gilmar Pisas, apesar di acusacionnan anterior, incluyendo mala maneho financiero y comportamiento sexual fuera di limite. Pisas a indica cu e no a ricibi ningun notificacion di polis ni husticia, ni na Corsou ni na Hulanda. E  mes tambe no a haci ningun denuncia, pasobra segun  e, ainda falta base suficiente mientras investigacion interno ainda no a finalisa. Si un keho lo wordo presenta despues, lo ta tarea di Ministerio Publico pa determina e siguiente paso. E situacion rond di Curaçaohuis na Den Haag tin un trasfondo mas amplio. Tin pregunta riba maneho financiero, entre otro pasobra documentonan tocante trabounan ehecuta no a wordo entrega na tempo. Tambe tin indicacion cu a paga pa servicio cu finalmente no a wordo entrega. Informacion solicita a yega na parlamento solamente den mitar di 2025.

Investigacion actual a cuminsa despues di kehonan di empleado. Desde e momento ey, gobierno a instala supervision adicional y a manda personal for di Corsou pa tuma encargo y investiga e situacion. Segun e prome minister, e proceso ainda ta den marcha y ta enfoca riba verificacion di declaracionnan. Mientras tanto, preocupacionnan no ta limita solamente na rol di e ex-minister. Den Parlamento, tambe ta analisa asunto interno manera ocupacion di personal y pago. Den un caso, a propone un arreglo di salida pa un empleado, pero esaki no a wordo acepta. Pisas a enfatisa cu el no a participa den esey.

Finalmente, liderato di Curaçaohuis ainda no ta defini completamente. Combersonan cu un director interino mester clarifica con e organisacion lo sigui structura.