Corte: Retiro di director no tabata hustifica. RDA mester paga 240 mil florin

ORANJESTAD – Un desicion importante di Corte den prome instancia diaranson a pone luz riba un conflicto grandi den sector petrolero na Aruba, unda un ex-director Richard Lacle, a sali ganador parcialmente despues di un bataya legal cu su ex doño di trabou.   Segun e faylo pronuncia 8 di april 2026, corte a determina cu e acusacionnan serio cu companianan RDA, FMSA y TDEA a hasi contra nan ex-director no a wordo comproba suficientemente. Aunke cu e acusacionnan tabata grave — incluyendo mal  administracion, falta di transparencia y problema financiero — corte a conclui cu no tin base solido pa considera esakinan como motibo urgente pa despido. Sin embargo, e caso no a termina completamente na favor di e ex-director.

RELACION COMPLETAMENTE KIBRA

Corte a reconoce  cu confianza entre partidonan tabata totalmente destrui. Segun e fayeo, despues di cambio di liderazgo den 2025,  e situacion a deteriora rapidamente, cu suspension, investigacionnan y tenshon creciente. E resultado:Continuacion di relacion laboral tabata imposibel. Pa esei, corte a aproba terminacion di contrato.

COMPANIA TIN CULPA PRINCIPAL

Den un buelta significativo, corte a determina cu e ruptura di relacion tabata principalmente culpa di e compania mes. Segun corte, no a wordo demostra cu e ex-director a faya den su funcion. Esaki a habri porta pa compensacion.

240 MIL FLORIN COMO COMPENSACION

Como resultado, Corte a ordena cu e companianan menciona mester paga un suma sustancial di Afl. 240.000 como indemnizacion. E monto aki ta considera “husto” tumando na cuenta e situacion, salario y circunstancianan di e caso.

IMPLICACION

E fay ta manda un mensahe claro: Acusacionnan serio sin prueba no ta basta pa un retiro inmediato. Mes tempo, e decision ta mustra cu ora confianza disaparece completamente, aun sin culpa directo, separacion ta inevitabel — pero cu costo.