Corte: Apelacion di Natura (Embassy Suites) rechasa pasobra nan a apela laat

ORANJESTAD – Corte di LAR a declara e apelacion di Natura Development N.V. , operador di e hotel Embassy Suites na Aruba, como no admisibel, pasobra e la wordo entrega fuera di e termino legal. Segun e sentencia di 25 di maart 2026,  corte a determina cu e compania a pasa e plazo di seis siman pa entrega su apelacion contra un decision di ministro encarga cu proteccion di naturaleza. 

KICO E CASO TABATA TRATA?

Natura Development, operador di Embassy Suites, a haya permiso anteriormente pa traha un beach   (incluyendo elevacion y extension di seabed) den un area na Noordwest di e hotel. Pero pa completa e proyecto, nan tabata mester un dispensacion bou di ley di proteccion di naturaleza. E dispensa ey no a wordo concede, y despues di varios paso legal y decisionnan anterior, e caso a termina na corte.

PROBLEMA PRINCIPAL: TEMPO

E punto clave den e caso no tabata e contenido, pero si e apelacion a wordo entrega na tempo. E decision oficial tabata 27 maart 2025 di corte di prome instancia, y e fecha pa ultimo dia di apelacion: tabata 8 mei 2025. Pero, e apelacion a drenta un dia laat, esta 9 di mei 2025. Corte a conclui cu esaki ta un dia demasiado laat, y segun ley, esaki ta suficiente pa rechaza e caso completo.

ARGUMENTONAN DI NATURA NO A LOGRA

Natura a argumenta cu nan a haya conocimiento di e decision un dia despues, y cu situacion politico (caida di gabinete Wever-Croes II) a crea confusion. Pero corte a bisa cla, cu e decision a wordo entrega mesun dia y cu no tin motibo balido pa hustifica un retraso. Ademas cu e responsabilidad ta keda cu e apelante.

VEREDICTO

Corte a dicidi cu e decision ta final, y cu e apelacion ta no admisibel. Ademas e caso no lo wordo evalua den contenido. Pa lesa e sentencia completo, click AKI.