Pinedo a clarifica ‘disgusto’ na Corsou cu Adidas a scohe arubiano Jeon como ‘embahador’

WILLEMSTAD – Manera ta conoci, e marca di deporte internacional Adidas a selecciona artista di Aruba, Jeon pa presenta e nobo ‘away kit’ di Corsou. Esaki a sosode durante un evento promocional internacional unda a lansa e nobo camisanan di salida di diferente ekipo nacional. Ta trata di e nobo uniforme di paisnan cu ya ta clasifica pa Mundial, esnan cu ainda tin chance pa clasifica of cu ya a keda elimina. Adidas a presenta tur ‘away kits’ mes momento y a conecta esaki cu un campaña cu artista y influencernan como cara di e paisnan. Pa Corsou, a scoge Jeon, entre otro pa motibo di popularidad di su cancion Mama Wak riba social media. Ta destaca cu Adidas mes a tuma decision tocante e representante pa cada pais, sin participacion di federacionnan di futbol nacional. Como ehemplo, marca a menciona Jamaica, unda a colabora cu Bob Marley Foundation. Aya a usa Skip Marley, nieto di Bob Marley, pa presenta e camisa. Tambe den e caso ey, federacion di futbol no a participa den seleccion di e representante. Adidas a enfoca conscientemente riba artista, dj’s, bailadornan, modelonan y influencer nan den e campaña pa aumenta visibilidad di e camisanan nobo. Segun informacion, marca no tabata na altura si Jeon tin algun relacion formal cu YDK.

RECLAMO Y CLARIFICACION DI PINEDO

Diaranson, a compronde cu na Corsou tabatin cierto reclamo cu ta usando un artista di Aruba como embahador pa e seleccion di futbol di Corsou cu ta bay mundial. E lo a causa cierto disgusto pasobra a usa un artista di Aruba, pa haci esaki. Pero durante un combersacion na radio 101 di Corsou, entre e moderador Maarten Schakel y Percy Pinedo diaranson mainta, Pinedo, cu ta envolvi den e aspectonan di e seleccion di Corsou,  a confirma cu ta e propio compania gigantesco di deporte ADIDAS a cera e acuerdo directo cu Jeon, despues cu e cantica cu e artista di Aruba a traha cu a bira un exito mundial, Mama wak. “Adidas a acerca Jeon directo”, Pinedo a bisa. Algo cu a sosode den otro paisnan tambe. “No ta cuestion cu si ta FIFA of FFK a haci esaki, sino esaki ta directo entre ADIDAS y Jeon. Esey a sosode!” Pinedo a sigui bisa.