Na Corsou, gasolin, diesel, awa y coriente lo subi considerablemente na luna di april

WILLEMSTAD – Subida di prijs di energia y combustible ta bini na luna di april, como consecuencia directo di tensionnan geopolitico den Medio Oriente. Asina director di Regulatory Authority of Curaçao (RAC), Curt Belfor, a confirma durante un conferencia di prensa convoca pa gobierno di Corsou.

Segun Belfor, solamente e expectativa di conflicto ya ta crea impacto riba prijsnan mundial, cu naturalmente ta refleja riba tarifanan local. E subida, segun el, no ta un decision local, sino resultado di desaroyonan internacional.

Pa loke ta trata combustible, gasolin lo subi di 1.941 sèn pa liter te 2.152 sèn, un aumento di 10.8%. Disel lo subi ainda mas fuerte: di 1.630 sèn pa liter te 2.22 florin, cu ta un salto significativo di 36.2%.

Tambe awa y coriente lo wordo mas caro. Aunque casi 50% di energia na Corsou ta bini di fuente renobabel manera solo y bientu, ainda tin impacto. Subida di coriente lo ta limita na aproximadamente 0,04 florin, algo cu ta relativamente bajo compara cu otro paisnan, justamente pa uso di energia renovabel.

Produccion di awa, cu ta depende di energia, tambe lo haya subida. Tarifa promedio lo pasa di 10,94 pa 11,14 florin pa metro cubico.

Autoridadnan ta advirti cu situacion mundial ainda incierto. Si tensionnan sigui, prijsnan por subi ainda mas den futuro.