DUO ta yuda ex-studiantenan na Corsou cu solucion pa debe di estudio

WILLEMSTAD -Dienst Uitvoering Onderwijs (DUO) ta invita ex-studiantenan na Corsou cu problema di pago relaciona cu nan debe di estudio pa un combersa personal. Durante e combersa, DUO ta duna splicacion tocante e debe di estudio y ta wak hunto cu e persona kiko ta e posibilidadnan pa atende e problema. Esaki por tuma lugar entre 7 y 17 di april na e oficina di DUO na Willemstad.

“Hopi hende cu tin problema pa haci pago ta perde control riba e situacion general of ta experimenta stres pa motibo di nan situacion financiero. Si bo traha un cita na tempo, den mayoria caso por evita cu e debe ta sigui subi of cu ta tuma medida manera oficina di cobransa of beslag riba salario,” Monique Hoogerwerf, coordinador di e area Caribe na DUO, a bisa. “Pa esey nos ta invita ex-studiantenan cu un debe hulandes pa traha un cita y bin papia cu nos, aunke e debe ya ta na oficina di cobransa.”

TRAHA CITA

Den poco tempo, un parti di e ex-studiantenan cu debe hulandes lo ricibi un invitacion personal via carta of email cu un link special pa traha un cita. E combersanan lo tuma lugar entre diamars 7 y diabierna 17 di april na e oficina di DUO na Hoogstraat 18, Willemstad.

BON BINI SIN INVITACION TAMBE

Personanan cu no a ricibi invitacion, pero cu tin pregunta tocante nan debe di estudio of problema cu pago, tambe ta bon bini. Mas informacion ta disponible riba duo.nl/cariben.

DUO ta ehecuta, entre otro, ley y regulacion riba tereno di financiacion di educacion, ta duna y cobra beka di estudio y compensacion pa gastunan escolar, y ta cuida e proceso di reconocimiento y regulacion di diploma.