Corte: Diamonds International ta ricibi golpe duro: Hof ta subi multa

ORANJESTAD –  Hof a subi   e multa pa compania di joyeria Crown Trading, conoci como Diamonds International significativamente, te na mas cu 355.000 florin. Cu esaki, Hof ta bolbe parcialmente riba un decision anterior di Corte den Prome Instancia, unda e multa tabata mas abou te 97.500 florin.

E CASO

E caso ta trata di violacion di regla nan contra lavado di placa y financiacion di terrorismo. Segun Banco Central di Aruba, e compania a raporta varios transaccionnan inusual hopi laat y no a haci suficiente investigacion riba clientenan cu un riesgo mas halto.

INVESTIGACION 

Investigacion a mustra cu cuatro transacion cash, tur ariba e limite di reportahe, a wordo reporta cu un atraso promedio di mas cu dos aña.

CASO ANTERIOR

Anteriormente, Gerecht den Prome Instancia a determina cu e multa di casi 450.000 florin impone pa Banco Central tabata demasiado halto y a baha e cantidad considerablemente. Den e decision ey, a tene cuenta cu tabata un cantidad limita di transaccionnan y cu finalmente e compania a cumpli cu e obligacion di reporta.

HOF CU OTRO CONCLUSION

Hof a yega awor na un conclusion diferente. Segun huez nan, Banco Central a fundamenta  e seriedad y duracion di e violacionnan suficientemente, y cu e reduccion anterior tabata excesivo. Hof a sigui en gran parti e calculacion di e autoridad di supervision y a fija e multa di nobo. Sinembargo, un parti di e sancion a wordo elimina. Di e tres caso unda no tabata suficiente investigacion di cliente, solamente uno a keda valida. Dos transaccion tabata di prome cu regla nan a wordo mas estricto, y pa esey no tabata mester wordo sanciona. Finalmente, e multa total a yega 355.812,50 florin. Di esaki, mas cu 266.000 florin ta pa reportahe hopi laat di transaccionnan, y casi 92.000 florin pa deficiencia den investigacion di clientenan. Di e total, a baha ainda 2.500 florin pa motibo cu e caso a dura mas cu e termino razonabel. Cu e decision aki, Hof ta enfatisa cu companianan cu ta bou ley contra labado di placa mester reporta transaccionnan inusual inmediatamente y haci investigacion cuidadoso di nan clientenan. Banco Central ta mantene un amplio libertad pa determina multa den caso di violacion.