KPA: Tin prohibicion total riba uso di drones riba Aruba pa e proximo dos dianan!

ORANJESTAD – Autoridadnan di Cuerpo Policial Aruba, Departamento di Aviacion y Gobierno di Aruba a anuncia dialuna cu lo tin un prohibicion total riba uzo di drones y cualkier aeronave di control remoto riba teritorio di Aruba durante bishita di Rey Willem-Alexander.

E prohibicion lo ta valido for di diamars 17 di maart 2026 pa 8:00 di anochi te diaranson 18 di maart 2026 pa 8:00 di anochi y ta aplica te na un altura maximo di 6500 pia den espacio aereo riba Aruba y 500 meter for di costa riba laman.

Tambe vuelonan local di tur tipo di aeronave, manera avioneta y helicopter, ta prohibi durante e periodo aki. Solamente vuelonan comercial internacional lo keda permiti pa baha y subi na Aeropuerto Internacional Reina Beatrix. Aeronavenan di autoridadnan local tin exepcion.

Segun autoridadnan, e medidanan ta wordo tuma pa motibonan di seguridad nacional, y comunidad ta wordo pidi pa respeta e prohibicion durante e dos dianan.